Albada

Tras 108 días en folga, o persoal de Albada consegue un novo convenio e a readmisión dos despedidos

A asemblea de aprobaba na noite do mércores o preacordo acadado entre Comité e empresa, pondo fin á folga en Nostián
14/11/13.
Logo de 108 días en folga, a exemplar loita dos traballadores/as de Albada achegaba os seus primeiros froitos ao conseguirse na madrugada do martes un principio de acordo para o convenio colectivo e a readmisión do persoal despedido. Preacordo que foi referendado sen votos en contra na asemblea de traballadores/as celebrada na noite do mércores e que pon fin a máis de tres meses de folga.

O Comité denuncia a nula vontade negociadora de Albada e os argumentos absurdos contra a arbitraxe

A representación do persoal acusa a empresa de pretender manter o conflito aberto indefinida e artificialmente
07/11/13.
O Comité da planta de Nostián criticou publicamente o rexeitamento por parte de Albada da petición de arbitraxe, asegurando que esta nova negativa vén confirmar “que a empresa pretende manter o conflito aberto indefinidamente, recorrendo a argumentos e razóns absurdas e falsas”.

O Comité de Albada denuncia a falta absoluta de vontade da empresa para solucionar o conflito

A representación dos traballadores/as vai solicitar a arbitraxe e suspendería a folga se a emprese acepta someterse á mesma
30/10/13.
A acta final da mediación remitida hoxe polo AGA e que supón o remate do proceso de mediación no conflito de Albada (aberto á instancias do Comité), vén confirmar a nula vontade da empresa para chegar a unha solución, tras máis de tres meses de folga na planta de Nostián e innumerábeis reunións.

O Comité de Albada e as centrais sindicais conseguen anular o ERTE presentado pola dirección da empresa

A Consellaría de Traballo arquiva o expediente ao non acreditarse a causa alegada e non darse os supostos legais
29/10/13.
O pasado 16 de setembro a Dirección de Albada presentou un Expediente de Regulación Temporal de Emprego, que o Comité de Empresa entendía que era ilegal e fraudulento, ao ser inexistentes as causas alegadas pola empresa. Ademais, dende o primeiro momento a representación do persoal denunciou que a única razón deste ERTE “era coaccionar e reprimir aos traballadores/as por estar en folga desde o 28 de xullo”.

O Comité de Albada advirte do colapso total da planta e a contratación de empresas externas

A representación do persoal vai presentar denuncias na Inspección de Traballo, en Medio Ambiente e no Concello da Coruña
21/10/13.
O Comité de Albada vén de informar que nas vindeiras horas vai presentar dúas denuncias contra os graves incumprimentos da empresa. Así, sinalan que Albada comezou a contratar empresas externas para realizar traballos que son propios do persoal da planta, que está en folga dende o pasado 28 de xullo. Así mesmo, denuncian que os incumprimentos na reciclaxe do lixo se teñen afondando nos últimos tempos, polo que nestes momentos a planta está desbordada e non se realiza ningunha labor de tratamento dos residuos.

Albada rexeita someterse á mediación vinculante e comunica ao persoal a posta en marcha do ERTE

O inicio do xuízo pola demanda de tutela de liberdade sindical está previsto para o 28 de Novembro
16/10/13.
O Comité e as centrais sindicais CIG, UGT e CCOO, á vista das últimas decisións de Albada, aclararon que a empresa rexeitou someterse á mediación vinculante pedida pola representación do persoal, e, ao mesmo tempo, comunicou a posta en marcha do ERTE para 61 traballadores/as. Para o Comité e as organización sindicais estas actuacións amosan, unha vez máis, a nula vontade da empresa para pórlle unha solución ao conflito que se vive na planta de Nostián.

O Comité de Albada solicita unha proposta de solución vinculante ao conflito de Nostián

Á vista do fracaso da reunión da mediación celebrada na tarde do martes
09/10/13.
O Comité de Albada vén de solicitar á mediadora que efectúe unha proposta de solución do conflito que se vive na planta de Nostián, e se pronuncie a respecto da readmisión dos traballadores/as despedidos/as e o convenio colectivo, as dúas cuestións abordadas nesta mediación.

Os traballadores/as do lixo da comarca da Coruña secundan masivamente unha nova xornada de folga

Centos de persoas maniféstanse en defensa do emprego e das condicións laborais no sector e contra da “estafa que practica Albada
05/10/13.
Traballadores/as de Albada, os servizos de recollida de lixo da Coruña e o Consorcio das Mariñas, o complexo de Sogama e a planta de Lousame secundaron maioritariamente a xornada de folga e a manifestación convocada en contra da reforma laboral, na defensa do emprego e as condicións laborais no sector. O persoal estivo arroupado polos centos de persoas que se sumaron á manifestación para deste xeito amosar o rexeitamento á estafa social á que están sometidos, pois pagan unha taxa por unha reciclaxe que Albada non realiza.

O Comité de Albada lamenta que o Concello da Coruña non asuma a súa responsabilidade

O persoal, con máis de dous meses en folga, reivindicou novamente ao goberno local que rescinda a concesión da planta de Nostián
03/10/13.
O Comité de Albada e as centrais sindicais CIG, CCOO e UGT, logo das últimas declaracións do voceiro do goberno municipal, lamentaron profundamente que ningún representante do Concello da Coruña acudise á reunión convocada o pasado martes nas dependencias do Consorcio das Mariñas. Con este xesto, denuncian, “sobreenténdese o desinterese do concello por atopar unha solución ao conflito e defender os intereses tanto dos traballadores/as como dos seus veciños/as fronte aos abusos empresariais”.

Representantes dos traballadores/as de Nostián reitera a fraude e ilegalidade do ERTE en Albada

Representantes sindicais mantiveron un encontro cos responsábeis do Consorcio das Mariñas para solicitar a súa intervención
01/10/13.
Membros do Comité de Albada e representantes das organizacións sindicais CIG, UGT e CCOO mantiveron na tarde deste martes xuntanza con representantes do Consorcio das Mariñas para abordar a grave situación existente na planta de Nostián e solicitar a intervención das administracións locais á vista dos reiterados incumprimentos por parte da empresa concesionaria das instalacións. Incumprimentos que, non hai que esquecer, se teñen denunciado dende os propios concellos e o Consorcio.

Distribuir contido