ERE

Concentración do persoal de AENA no aeroporto de Santiago contra o ERE encuberto.

Esta é a primeira das mobilizacións convocadas pero xa anuncian que “haberá máis”
19/4/13.
O persoal de AENA de Lavacolla concentrábase esta mañá no aeroporto para denunciar o Plan de Viabilidade que se vén de pór en marcha e que implica unha diminución do 20% do cadro de persoal -31 traballadoras/es menos-, vulnerando así o convenio colectivo vixente e o acordo polo que se fixaba en 138 traballadores/as o cadro mínimo operativo. Esta é a primeira mobilización convocada, pero a sección sindical da CIG xa anuncia que haberá máis e reitera o seu chamamento ao resto dos sindicatos para unir esforzos e paralizar este ERE encuberto que temen teña como obxectivo a privatización.

O persoal de AENA no aeroporto de Santiago mobilizarase contra o ERE encuberto xa en marcha

Convocan unha concentración para o venres 19 de abril, ás 12:30 horas na nova terminal
17/4/13.
AENA vén de pór en marcha un Plan de Viabilidade que implica unha diminución do 20% do cadro de persoal no aeroporto de Santiago. A sección sindical da CIG denunciou esta mércores, en rolda de prensa, que deste xeito Lavacolla pasará a ter 31 traballadores/as menos vulnerando así o convenio colectivo vixente e o acordo polo que se fixaba en 138 traballadores/as o cadro mínimo operativo. Alertan das repercusións que isto terá na calidade da atención e no normal funcionamento do servizo.

Neira y Ortegal atrasa o pago dos salarios como represalia aos traballadores/as por oporse ao ERE

O persoal ten pendente de cobro a nómina de novembro e a paga extraordinaria de decembro
21/12/12.
A CIG de Ferrol vén de denunciar a precaria situación na que se atopan os traballadores/as de Neira y Ortegal, aos que a empresa adebeda as nóminas de novembro e a paga extraordinaria de decembro, e todo parece indicar que tampouco ten intención de abonar nos vindeiros días os salarios deste mes.

CIG-Servizos rexeita o ERE en Paradores, que suporá a perda duns 100 postos de traballo en Galiza

Demanda a dimisión da presidenta, Ángles Alarcó, que dispón dun salario de 180.000 euros sen que se coñezan as súas funcións
17/12/12.
A CIG manifesta o seu total rexeitamento ao ERE que está levando a cabo a empresa PARADORES en todo o estado e en especial no que fai referencia aos centros ubicados en Galiza. En plena negociación do convenio estatal que afecta aos paradores de Galiza agás o do Hostal dos Reis Católicos que ten convenio propio e que tamén se estaba negociando ata que a empresa respondeu en ambos casos presentando un ERE que suporá a perda de case 100 postos de traballo en Galiza, incluíndo o peche definitivo dos paradores de Ferrol e Verín, así como o peche parcial no caso de Monforte e San Estevo, Vilalba e Tui e destrucción de postos de traballo no resto de centros do noso país.

O PP organiza unha cea “solidaria” no hotel dunha deputada que non paga ao persoal

Pazo de Libunca
16/12/10.
O PP vai celebrar o 17 de decembro unha cea “solidaria” no Hotel Pazo Libunca, en Narón, propiedade de Natalia Barros, deputada autonómica polo partido e responsábel de que os seus empregados non cobren desde outubro e, nalgún caso, mesmo desde abril. O hotel presentou un ERE e as autoridades encargadas da súa resolución estarán presentes na cea, ao igual que Núñez Feijóo, segundo manifesta a CIG-Servizos de Ferrol.

A autoridade laboral rexeita o ERE de Neira & Ortegal

18/9/10.
A Consellería de Traballo rexeitou o ERE presentado por Neira & Ortegal por deficiencias na documentación e indicio de fraude de lei por incluír e posteriormente retirar do expediente catro familiares directos dos socios. A intención da sociedade era suprimir 19 postos de traballo.

A práctica totalidade do cadro de Neira & Ortegal secunda a folga

03/9/10.
A folga do 2 de setembro en Neira & Ortegal, secundada polo 95% do persoal, serviu para que a empresa aboase o salario de xullo. Porén, a compañía aínda debe a paga extraordinaria. A protesta convocada polo comité tamén evidenciou o rexeitamento contra o ERE, cuxa resolución pola autoridade laboral está prevista para a vindeira semana.

Convocada folga en Neira & Ortegal o 2 de setembro en contra do ERE

01/9/10.
O cadro de persoal de Neira & Ortegal S.L, empresa dedicada á compra-venda de materiais de construción con centros en Ferrol, Narón, Ortigueira e Viveiro, convocou folga para o 2 de setembro co obxecto de reclamar os salarios adebedados e en contra do Expediente de Regulación de Emprego de extinción proposto pola sociedade.

Distribuir contido