manifestación

A sección sindical da CIG de La Voz de Galicia informa de que este luns, día 8 de xullo, tivo lugar unha reunión do Comité Intercentros convocada polos delegados que decidiron suspender a manifestación do domingo. A xuntanza contaba, en principio, cun único punto da orde dia: "preparar unha reunión coa empresa". Aceptouse, porén, a suxestión dos membros da CIG de engadir tamén a validación da decisión de desconvocar a manifestación, a renuncia dos membros da CIG dos cargos que ostentaban na dirección do comité e a elección dunha nova dirección.

Persoal de Seaga saíu este mércores á rúa, convocado pola CIG-Servizos e polos comités provinciais, para denunciar a redución das contratacións na empresa pública, co único obxectivo de evitar recoñecer a condición de fixos discontinuos dos traballadores e traballadoras que entren a desenvolver a súa actividade nesta empresa pública. O secretario nacional de CIG-Servizos, Paulo Rubido, denunciou ademais que tanto a administración como Natutecnia convocaron as probas para acceder a un posto de brigadista, casualmente o mesmo día da mobilización, o que non impediu que os que se examinaron en Compostela se sumaran cando xa comezara a marcha.

A CIG deu a coñecer os horarios e lugares de onde sairán os participantes na “Marcha galega polo emprego”, unha iniciativa que pretende mobilizar desempregados de todo o país que irán a pé até Compostela desde Ferrol, A Coruña, Cee, Lugo, Pontevedra, Vigo e Ourense. Unha vez que alcancen a capital nacional, o 3 de xullo, tomarán parte nunha manifestación.

Algo máis de 6.000 persoas -1.500 delas desprazadas desde Galiza- secundaron o 5 de abril en Madrid a manifestación convocada pola CIG, a maioría sindical vasca (ELA, LAB, STEE-EILAS, EHNE e HIRU), a central catalá CSC e a canaria IC. A marcha, que rematou fronte ao Ministerio de Traballo, decorreu baixo o lema “Polo dereito a decidir as nosas condicións laborais e sociais”.