provincia de Pontevedra

Inícianse mobilizacións para renovar o convenio do comercio téxtil pontevedrés

03/5/10.

Persoal do comercio téxtil da provincia de Pontevedra iniciou o 30 de abril en Vigo unha campaña de mobilizacións para demandar a renovación do convenio sectorial, cuxa vixencia expirou en decembro de 2008. A mesa da comisión negociadora aínda se constituíu o pasado 28 de abril e nela só está representada unha asociación empresarial. Inditex, o grupo con máis estabelecementos no sector, négase a participar no proceso.

CC.OO, UGT e FETICO asinan un preacordo no comercio de alimentación pontevedrés

Folga no Comercio de Alimentación en Vigo 7

03/12/09.

As centrais CC.OO, UGT e FETICO asinaron un preacordo no convenio do comercio de alimentación da provincia de Pontevedra nunha mediación do AGA que se estendeu desde as 16:00 horas do 2 de decembro até as 02:00 horas do día posterior. CIG-Servizos non rubricou o texto ao estar en desacordo coa vixencia (tres anos) e co incremento retributivo, entre outras cuestións. O persoal está convocado a asembleas, o 4 de decembro ás 22:00 horas nos locais da CIG en Vigo e Pontevedra, para someter a votación o preacordo.

Éxito sen paliativos da folga do comercio de alimentación malia as ameazas dos empresarios

Folga no Comercio de Alimentación: piquete en Piadela 13

29/11/09.

Por volta do 95% do persoal do comercio de alimentación secundou as folgas convocadas o 27 de novembro nas provincias da Coruña e Pontevedra. O paro foi total en Compostela e na nave de distribución de Gadisa, en Piadela (Betanzos). Este grupo deu novas mostras da súa actitude represiva ao impedir o acceso ás tendas dos comités de empresa e folga para exercer o seu labor informativo.

Comezan as mobilizacións do Comercio de Alimentación

23/11/09.

Concentracións en Betanzos, Poio e Ferrol serviron como punto de partida da campaña de mobilizacións no Comercio de Alimentación da Coruña e Pontevedra, cuxos traballadores/as están en pugna para conseguir convenios dignos. As protestas sucederanse ao longo desta semana até desembocar na folga do 27 de novembro, que afectará o persoal do sector en ambas provincias.

O persoal do Comercio de Alimentación pontevedrés tamén irá á folga o 27 de novembro

19/11/09.

Traballadoras e traballadores do Comercio de Alimentación da provincia de Pontevedra decidiron en asembleas acudir á folga o 27 de novembro como resposta ao desplante patronal na mesa de negociación do convenio. Deste xeito, a folga afectará máis de 30.000 empregados/as e uns 2.200 estabelecementos entre as provincias pontevedresa e coruñesa.

Intensifícase a campaña informativa sobre o conflito do Comercio de Alimentación

11/11/09.

A menos dunha semana da celebración das asembleas do persoal do Comercio de Alimentación da Coruña e Pontevedra nas que probabelmente se aprobe a convocatoria de folga, CIG-Servizos está a visitar múltiples centros de traballo para concienciar os empregados da importancia de se mobilizar para conseguir convenios dignos.

O Comercio de Alimentación baralla a folga como medida para desbloquear a negociación

09/11/09.

A última xuntanza da negociación do convenio do Comercio de Alimentación da Coruña, o 6 de novembro, supuxo a ruptura definitiva entre a parte social e a patronal, do mesmo xeito que aconteceu en Pontevedra semanas atrás. Agora, o persoal de ámbalas dúas provincias está convocado a asembleas o 17 e 18 de novembro, nas que posibelmente se acorde a convocatoria de folga no sector.

Celta Prix despide un bombeiro do Morrazo que se significou na loita polo convenio

21/10/09.

Celta Prix, concesionaria do Parque Comarcal de Bombeiros do Morrazo, despediu un traballador que se significou na loita polo convenio, ademais de ser un dos máis activos contra a privatización da xestión do futuro Consorcio Provincial. O 22 de outubro está prevista unha concentración ás 12:00 horas diante da Deputación de Pontevedra para esixir a súa readmisión.

Chamamento á afiliación do comercio vario e da hostalaría para reclamar os atrasos

21/9/09.

CIG-Servizos fai un chamamento a toda a súa afiliación que traballa no Comercio vario da provincia da Coruña e na Hostalaría das provincias pontevedresa e coruñesa para que acuda aos locais do sindicato coa intención de reclamar os atrasos.

O persoal do Comercio vario coruñés pode reclamar as cantidades adebedadas dos anos 2008 e 2009, do mesmo xeito que os traballadores e traballadoras da Hostalaría pontevedresa. Pola súa banda, os empregados e empregadas da Hostalaría da provincia da Coruña poden solicitar os atrasos correspondentes á revisión salarial de 2009.

200 persoas acoden en Vigo á asemblea de persoal do Comercio de Alimentación pontevedrés

18/9/09.

200 persoas asistiron á asemblea do persoal do Comercio de Alimentación da provincia de Pontevedra celebrada en Vigo na noitiña do 17 de setembro, convocada polos sindicatos CIG, UGT, CC.OO, FETICO e USO en relación co estancamento da negociación do convenio.

Os representantes dos e das traballadoras informaron os asistentes das intencións dos empresarios de ofertar un incremento salarial do 1% para o 2009, un convenio con catro anos de vixencia, conxelar a antigüidade, eliminar as baixas ao 100%, así como suprimir a compensación e absorción.