Urbaser

Comité de Urbaser denuncia na Fiscalía vulneración do dereito á folga logo de que Tragsa recollese o lixo

Este luns cúmprese unha semana do inicio do paro indefinido
16/6/14.
A piques de cumprirse unha semana de folga, as traballadoras e os traballadores de Urbaser Lugo concentrábanse esta mañá diante da Audiencia Provincial, coincidindo coa presentación da denuncia na Fiscalía por vulneración do dereito á folga, logo de que persoal de Tragsa (empresa contratada polo Concello) estivera realizando recollida de lixo durante a fin de semana.

Urbaser intensifica as medidas represivas e abre expediente a todo o Comité de Folga

Os/as traballadores/as advirten que recorrerán á Fiscalía se se confirma que o Concello pon a Tragsa a facer a recollida do lixo
13/6/14.
A folga indefinida que dende as 00:00 horas da madrugada do luns ao martes se está desenvolvendo na recollida de lixo e limpeza urbana de Lugo semella que vai ter un longo recorrido logo das últimas medida represivas adoptadas pola empresa Urbaser, que acordou abrir expediente a todo o Comité de Folga, unha medida de presión que se vén sumar ao despedimento de 12 traballadores/as.

Urbaser Lugo despide 12 traballadores/as o primeiro día de folga

A totalidade do persoal está a secundar a segunda xornada do paro indefinido
11/6/14.
O 100% do cadro de persoal de Urbaser Lugo está a secundar este mércores a segunda xornada de folga indefinida convocada en demanda dun convenio digno, con ánimo e unida, a pesar da drástica medida adoptada pola empresa coincidindo co inicio da folga: despedir a 12 traballadores/as, dous deles membros do Comité, aos que lle abriu expediente disciplinario.

O persoal de Urbaser Lugo irá a folga indefinida dende o 9 de xuño se non hai acordo para o novo convenio

Os traballadores e traballadoras fixeron e unha concentración e ocuparon este venres a Casa do Concello
23/5/14.
Os traballadores e as traballadoras da recollida de lixo e a limpeza urbana do Concello de Lugo irán a folga indefinida, se antes do 9 de xuño non se acada un acordo para o novo convenio colectivo que respecte os dereitos económicos e sociais. Así o acordou a asemblea do persoal, que hoxe mesmo realizou unha concentración e unha ocupación simbólica da Casa do Concello, para demandar o desbloqueo da negociación.

O Comité de Albada advirte do colapso total da planta e a contratación de empresas externas

A representación do persoal vai presentar denuncias na Inspección de Traballo, en Medio Ambiente e no Concello da Coruña
21/10/13.
O Comité de Albada vén de informar que nas vindeiras horas vai presentar dúas denuncias contra os graves incumprimentos da empresa. Así, sinalan que Albada comezou a contratar empresas externas para realizar traballos que son propios do persoal da planta, que está en folga dende o pasado 28 de xullo. Así mesmo, denuncian que os incumprimentos na reciclaxe do lixo se teñen afondando nos últimos tempos, polo que nestes momentos a planta está desbordada e non se realiza ningunha labor de tratamento dos residuos.

Os traballadores/as do lixo da comarca da Coruña secundan masivamente unha nova xornada de folga

Centos de persoas maniféstanse en defensa do emprego e das condicións laborais no sector e contra da “estafa que practica Albada
05/10/13.
Traballadores/as de Albada, os servizos de recollida de lixo da Coruña e o Consorcio das Mariñas, o complexo de Sogama e a planta de Lousame secundaron maioritariamente a xornada de folga e a manifestación convocada en contra da reforma laboral, na defensa do emprego e as condicións laborais no sector. O persoal estivo arroupado polos centos de persoas que se sumaron á manifestación para deste xeito amosar o rexeitamento á estafa social á que están sometidos, pois pagan unha taxa por unha reciclaxe que Albada non realiza.

O Comité de Albada lamenta que o Concello da Coruña non asuma a súa responsabilidade

O persoal, con máis de dous meses en folga, reivindicou novamente ao goberno local que rescinda a concesión da planta de Nostián
03/10/13.
O Comité de Albada e as centrais sindicais CIG, CCOO e UGT, logo das últimas declaracións do voceiro do goberno municipal, lamentaron profundamente que ningún representante do Concello da Coruña acudise á reunión convocada o pasado martes nas dependencias do Consorcio das Mariñas. Con este xesto, denuncian, “sobreenténdese o desinterese do concello por atopar unha solución ao conflito e defender os intereses tanto dos traballadores/as como dos seus veciños/as fronte aos abusos empresariais”.

Representantes dos traballadores/as de Nostián reitera a fraude e ilegalidade do ERTE en Albada

Representantes sindicais mantiveron un encontro cos responsábeis do Consorcio das Mariñas para solicitar a súa intervención
01/10/13.
Membros do Comité de Albada e representantes das organizacións sindicais CIG, UGT e CCOO mantiveron na tarde deste martes xuntanza con representantes do Consorcio das Mariñas para abordar a grave situación existente na planta de Nostián e solicitar a intervención das administracións locais á vista dos reiterados incumprimentos por parte da empresa concesionaria das instalacións. Incumprimentos que, non hai que esquecer, se teñen denunciado dende os propios concellos e o Consorcio.

Asesores das centrais sindicais realizaron un peche nas oficinas de Albada para reclamar solucións

A medida de presión desenvolveuse coincidindo coa última xuntanza marcada pola empresa do período de consultas do ERTE
30/9/13.
Membros da Comisión Negociadora para o ERTE de Albada iniciaban un peche por volta das 14:00 horas nas oficinas de Nostián, en rexeitamento ao expediente regulador que a empresa pretende aplicar na planta de tratamento de residuos e para reclamar unha solución ao conflito. A medida de presión desenvolveuse coincidindo coa última reunión do período de consultas, segundo o calendario proposto unilateralmente pola propia compañía. Porén, logo de doce horas, sobre ás dúas da madrugada, os participantes no peche acordaban levantar o encerro ante a falta de movementos por parte da empresa.

O Comité de Albada reclama á empresa que diga con claridade se está disposta a resolver o conflito

Reitera a súa vontade para manter a negociación e e lembra que foi a representación dos traballadores/as quen instou a mediación
27/9/13.
O Comité de Albada vén de salientar a súa “completa disposición á negociación e o nulo interese por dilatar a resolución do conflito”, en resposta ás afirmacións da empresa aparecidas este venres na prensa. “Que está fóra de toda dúbida o interese do Comité a as organizacións sindicais por atopar canto antes unha saída negociada demóstrao o feito de que se existe unha mediación aberta é grazas á iniciativa da parte social, que tivo que solicitala até en dúas ocasións porque a empresa se negaba a aceptar dita mediación”, aclaran.

Distribuir contido