Traballadores/as da seguridade privada de toda Galiza concéntranse diante do IKEA en demanda dun convenio digno

p1170568.grande.jpg
15/10/10.Traballadores/as da seguridade privada de toda Galiza concéntranse diante do IKEA en demanda dun convenio digno A CIG retoma as mobilizacións no sector aproveitando o tirón mediático da inauguración da tenda sueca na Coruña Vixilantes da seguridade privada de todo o País concentráronse esta mañá diante do edificio do IKEA en A Coruña, coincidindo coa inauguración do primeiro estabelecemento da cadea sueca en Galiza. A protesta, convocada pola CIG-Servizos, retoma así as mobilizacións que os traballadores/as do sector veñen realizando dende hai máis de ano e medio en demanda dun convenio digno e con dereitos e cuxa negociación está paralizada dende hai meses. 10-07-20 Mobilización seguridade privada na inauguración do IKEA

Pouco despois das 10 da mañá, máis dun cento de traballadores e traballadoras da seguridade privada comezan a concentración diante das portas do IKEA en A Coruña, baixo a curiosa mirada das ducias de persoas que se achegaron até o lugar. Dende a CIG-Servizos explicaban que fixeron coincidir a data da protesta coa da inauguración da nova tenda da empresa sueca para dar maior visibilidade á reivindicación e pór en coñecemento da cidadanía a situación de parálise na que se atopa a negociación colectiva no sector.  Segundo informaron, o pasado 24 de xuño tivo lugar unha nova xuntanza da mesa de negociación, na que a patronal retirou a súa anterior proposta salarial (0% no 2009 e 0,3% en 2010) “para non ofrecer nada e pospoñer a negociación a outubro”. Negociación que adiantou a patronal, continuará ou non “en función da situación económica do Estado español”. Dende a CIG-Servizos denúnciase que os traballadores e traballadoras do sector da seguridade privada non só están vendo conxelados os seus salarios, senón que nos últimos anos rexistraron un perda do seu poder adquisitivo. Así, explican, os salarios perderon o IPC final dos anos 2008 (1,4%) e 2009 (0,8%). Agora, no 2010, o goberno do estado español subiu o IRPF en 400 euros, o que representa exactamente, aclaran, un 2,57% sobre o salario dun vixiante de seguridade en cómputo anual. A maiores, o incremento do 2% no IVE, fai que o total acumulado de perda salarial real e directa sexa desde o 2009 dun 6,77%. “É dicir, desde o ano 2009, temos de perda de poder adquisitivo 87 euros mensuais e 1051,5 euros anuais. Os traballadores e traballadoras da Seguridade Privada non estamos co salario conxelado, estamos perdendo cartos. E mentres as empresas seguen a actualizar os prezos aos clientes e continúan a manter as súas marxes de beneficio”, denuncia a Federación de Servizos da CIG.