Despois de sete reunións, as negociacións están bloqueadas xa que a empresa se nega a trasladar unha proposta económica xusta, que garanta un salarios dignos e o mantemento do poder adquisitivo. Logo de presentar varias ofertas con cálculos de porcentaxe para os incremento que resultaban complexos, incoherentes e cuestionábeis, a última proposta de Serveo Industrial consiste nunha suba lineal do 3%.

Unha contía que non responde á demanda do persoal, que reivindica incrementos xustos do 4% para os anos 2025 e 2026 e do 3,8% para os anos 2027 e 2028. Non obstante, explica o delegado da CIG, a empresa négase en redondo a mellorar a súa oferta polo que “non nos queda outra saída que ir á folga para desbloquear a situación”.

Tras esta xornada de paros, o calendario de folgas parciais continuará o luns e mércores da próxima semana e, de non producírense avances na reunión prevista para mañá coa empresa, as medidas de presión intensificaranse coa convocatoria de paros diarios ou estendendo a folga a toda a xornada laboral.

Serveo Industrial é unha principais auxiliares de Alcoa e conta con arredor de 130 traballadores e traballadoras que realizan o mantemento mecánico e soldadura nos departamentos de precipitación e dixestión.