Carril chama a acumular forzas cara ao 1º de Maio ante a ofensiva ultraneoliberal e belicista
A CIG celebrou asembleas de delegados/as e protestas en nove localidades no marco da campaña ‘Stop precariedade. Traballo digno’
Nacional -
O secretario xeral da CIG, Paulo Carril, chamou hoxe a intensificar a acumulación de forzas cara a celebración do próximo Primeiro de Maio, Día Internacional da Clase Obreira, nun contexto de ofensiva ultraneoliberal e belicista caracterizado pola institucionalización da pobreza laboral, a guerra prolongada na Ucraína e o xenocidio contra o pobo palestino. A central sindical celebrou asembleas de delegados/as e mobilizacións en nove localidades do país no marco da campaña que está a desenvolver dende comezos de ano baixo o lema ‘Stop precariedade. Traballo digno’.
![](https://cig.gal/imaxes/adaptadas/780/files/novas/2024/04/17/Mobilizacions%20comarcais/24-04-17_Protesta_delegados_Pontevedra_01.jpeg)
Durante a súa intervención na asemblea de Vigo o máximo responsábel da CIG alertou sobre o constante aumento da precariedade e baixos salarios pola “combinación perversa” da reforma laboral de hai dous anos -que estende a pobreza laboral e o abuso da contratación a tempo parcial e fixa descontinua- e da actual carestía da vida. Até o punto de que máis do 50% das familias e o 26% das persoas traballadoras están en situación ou risco de pobreza.
Unha reforma que supuxo a xeneralización da contratación a tempo parcial e a fixa-descontinua, que substituíu os contratos temporais e que medrou, desde 2021, nun 125,1%, cun incremento en 4,1 puntos das persoas asalariadas con xornada parcial ou fixa descontinua na contratación indefinida. Ademais, malia aumentar nun 20,7% os despedimentos, as indemnizacións percibidas baixaron unha media do 34,9%. Cifras que confirman que con esta reforma laboral “avanza o despedimento libre a gratuíto” porque a patronal dispón de máis mecanismos legais para empeorar as condicións laborais e salariais da clase traballadora.
O que na práctica que se traduce na instauración, por lei, da inestabilidade laboral, o que está a provocar a institucionalización da pobreza laboral, “polo que hoxe ter traballo xa non garante os ingresos necesarios para vivir dignamente e poder acceder a dereitos básicos como alimentación e vivenda. Unha situación que é mesmo peor para a mocidade e as mulleres, que foron convertidas en man de obra barata. Por iso a campaña que está a desenvolver a CIG esixe tamén unha nova lexislación laboral e social que restitúa os dereitos perdidos e favoreza novos dereitos e regulacións que nos fortalezan como clase traballadora galega.
![](https://cig.gal/imaxes/adaptadas/780/files/novas/2024/04/17/Mobilizacions%20comarcais/2024-04-17_%20ACorunha_Concentracion_00.jpg)
Imposición de políticas antiobreiras
Carril fixo fincapé tamén en que como esixencia polo cumprimento do plan de axuste para acceder aos fondos europeos estanse a poñer enriba da mesa medidas que van significar recortes no sistema público de pensións e no acceso á xubilación parcial. Neste senso, censurou que na mesa de diálogo social -“que só serve para enterrar dereitos”- todo é “oscurantismo e falta de información” arredor do debate sobre a necesidade de instaurar coeficientes redutores da idade de xubilación en determinadas profesións. Ao tempo que advertiu dos actuais intentos de “privatizar a saúde” coa derivación ás mutuas da atención a continxencias comúns do mundo do traballo.
“E todo nun contexto no que vén de tomar posesión un novo Goberno galego, fronte ao que xa adiantabamos que a necesidade de mobilizarnos e de loitar para impedir que a maioría absoluta do PP se converta nunha apisonadora de dereitos e de imposición de políticas antiobreiras, antisociais, antigalegas, de recorte de servizos públicos; unhas políticas que non sirvan para dignificar as condicións de vida nin se traduzan dun desenvolvemento económico que garanta a xeración de industria e de emprego de calidade”.
Finalmente, denunciou a actual “apoloxía do belicismo e da guerra·e lamentou que non se estea a facer nada para parar o “xenocidio e o holocausto” que padece o pobo palestino a mans de Israel e dos seus aliados occidentais “nin a guerra permanente que se vive en Europa”. Neste senso, criticou que o Goberno español veña de aprobar un gasto de máis de 1200 millóns de euros para incrementar a súa reserva armamentística, “algo que vai en favor do belicismo, da OTAN e da imposición dunhas relacións internacionais inxustas sobre a base da guerra e da subordinación dos pobos e das nacións”.
Unha vez rematada a asemblea os máis de 300 delegados/as sindicais participantes saíron en manifestación até a delegación da Xunta. Nas outras seis cidades galegas, ademais de en Vilagarcía e Viveiro, tamén tiveron lugar mobilización ao remate das asembleas.