Para o secretario comarcal da CIG-Servizos, Francisco Cartelle, esta actuación “de todo punto sorprendente” é “moi discutíbel dende o punto de vista legal”. A falta de descanso entre xornadas non é o único incumprimento que detectou a Inspección neste centro de traballo, “resultando que había máis ilícitos non publicitados polo presidente da entidade”.

A empresa, apunta Cartelle, viña practicando un sistema de quendas de traballo que provocaba que en determinados momentos se incumprisen as doce horas mínimas de descanso diario, abocando o persoal a ter que traballar sen ter descansado o suficiente. Ademais a Inspección tamén obriga a empresa a poñer a disposición das persoas traballadoras os rexistros da xornada dos últimos catro anos, tal e como marca a lei, tras unha serie de negativas expresas e reiteradas por parte da dirección a dar acceso a ditos rexistros.

Toda esta situación sostida durante anos, “sumado a unha xunta directiva despótica que negou por moitas veces reunirse co persoal para tratar de acadar unha solución satisfactoria e negociada para todas as partes”, provocou que o persoal, “farto de ver como se vulneraban os seus dereitos sistematicamente” e de que se puxeran continuamente as persoas usuarias como escusa para non respectarse os dereitos laborais, “decidiu actuar”.

A este respecto, Cartelle subliña que a prioridade de toda organización benéfica “debería ser coidar do persoal que dá o servizo antes de comezar a repartir beneficencia ao exterior, porque só así se pode garantir un servizo digno e de calidade”.