Aínda que fican pendentes de resolver pequenas cuestións relacionadas coa xornada laboral (que terán que ser abordados coa nova empresa), lográronse os principais obxectivos da folga polo que o persoal acordou proceder a desconvocar os paros previstos para este mes. Para o secretario de Organización da CIG de Ferrol, Xoán Galdo, resulta inconcibíbel que “nun servizo que depende dunha administración pública como este o Concello e a empresa adxudicataria non se movan até ter enriba da mesa unha convocatoria de folga”.

Sinala que só despois do persoal dar este paso, “o Goberno municipal se apresurou a abonar unhas facturas que estaban pendentes e a empresa axilizou o pago dos salarios”. O responsábel sindical agarda que, ante a nova licitación, o Concello das Pontes garanta que se respectan todos os dereitos laborais e salariais que marca o convenio colectivo de aplicación e insta a empresa que se faga co servizo a manter unha reunión de urxencia para tratar as cuestións que fican por resolver.