Masivo seguimento na primeira xornada de folga convocada en VITRASA
O comité anuncia que impugnará o número de buses que a empresa obrigou a circular
Vigo -
O comité de empresa de VITRASA cualifica de “masivo” o seguimento da primeira xornada de folga, á que se sumou todo o persoal agás os servizos mínimos. A este respecto, o seu presidente, Imanol Arnoso, anuncia que impugnarán o número de autobuses que a empresa obrigou a cubrir o servizo. Lembra que nunha xornada normal circulan 94 autobuses, que o concello decretou uns servizos mínimos do 50%, o que implicaría que saíran só 47 autobuses, pero que VITRASA obrigou a saír a 52 vehículos.
Arnoso salienta ademais a elevada participación na concentración convocada ás portas da empresa, onde chegaron a sumarse preto de 90 traballadores/as malia haber moito persoal de vacacións ou de baixa por IT.
O presidente do comité explica que o persoal acordou en asemblea convocar estas xornadas de folga –están previstas novas convocatorias para o venres día 6, o sábado 7 e o domingo 8 de agosto- para denunciar os incumprimentos do convenio por parte de VITRASA, ademais de demandar melloras nas súas condicións laborais.
Neste sentido denuncian xornadas interminables que chegan a ser de até 10 horas seguidas de condución, falta de descanso dentro da propia xornada, situacións de estrés estremo ao volante, a negativa da dirección a negociar un convenio caducado e mesmo dous atrasos no abono das nóminas nos últimos seis meses. Atrasos dos que VITRASA responsabiliza ao concello de Vigo.
Incumprimento dos requirimentos da Inspección de Traballo
![](https://cig.gal/imaxes/adaptadas/780/files/novas/2021/08/03/2021-08-03%20concentracion%20folga%20Vitrasa%20002.jpg)
Imanol Arnoso sinala que precisamente por estas cuestións presentaran denuncia diante da Inspección que deu a VITRASA un prazo máximo até setembro do pasado ano para darlle unha solución. A empresa non acatou nin este prazo nin atendeu os requirimentos da Inspección. “Consideramos que podiamos incluír estes temas na mesa de negociación do novo convenio, pero tamén aí se negou a empresa”.
Lembra que o anterior convenio remataba en decembro e que cando se puxeron todas estas demandas sobre a mesa a empresa rexeitou sequera falar de nada que supuxera un incremento económico. “Nin sequera atendeu a demanda de taquillas que solicitabamos para o persoal de condución”. Unha petición que denegou mesmo diante da propia Inspección de Traballo.
O comité insiste en que as súas demandas son todas de carácter social e exixe que se aborden e inclúan no novo convenio, que ten que ser negociado xa.
Inmobilismo do concello
O comité denuncia o inmobilismo do concello de Vigo diante dos incumprimentos reiterados por parte da empresa "como son o impago dos salarios ou dar un servizo deficiente que deixa pasaxeiros/as nas paradas a pesar de ter autobuses parados nas cocheiras". Incumprimentos aos que o Concello, "como adxudicador da concesión, debería requirir que se dea unha solución inmediata".
Denuncia ademais a falta de resposta do seu alcalde, Abel Caballero, á súa solicitude dunha xuntanza pola que aínda agardan.