As principais reivindicacións da parte social pasan por garantir uns salarios dignos, que non se perda capacidade adquisitiva, ter unha xornada adecuada ao século XXI para poder conciliar e que se compense o traballo nocturno ou en domingos.

Porén, a patronal, que deu por rachadas as negociacións, trasladou unha proposta de incremento que apenas acada o 3%, sen carácter retroactivo a 1 de xaneiro e sen xerar atrasos; non quere asumir a incorporación dunha cláusula de revisión ao IPC; nin tampouco aceptou o abono da nocturnidade nin incorporar un complemento polo traballo en domingo.

A redución da xornada é outra das demandas básicas nesta negociación e que se recoñezan como tempo de traballo efectivo os tempos de presenza e os descansos obrigatorios de tráfico.

Estas mobilizacións teñen como obxectivo concienciar o persoal do sector e acompañan ao reparto de follas informativas que se está a realizar nos centros de traballo e polígonos loxísticos para informar da situación da negociación colectiva. No caso da patronal non regresar á mesa, xa están previstas asembleas de persoal nas distintas cidades para decidir as próximas accións e acordar a convocatoria de folga.