Xornada de mobilizacións contra a violencia machista e o acoso sindical en Prosegur
A CIG fixo dúas concentracións na Coruña para denunciar as prácticas vulneradoras dos dereitos que se dan nesta empresa
A Coruña/Ourense -
A CIG desenvolveu este mércores na Coruña unha xornada de mobilizacións contra as agresións machistas e o acoso sindical e laboral na empresa Prosegur. A primeira protesta realizouse no Carrefour do CC dos Rosais, centro no que traballa o delegado sindical da CIG que vén sufrindo acoso por exercer o seu labor sindical.
![](https://cig.gal/imaxes/adaptadas/780/files/novas/2022/02/02/prosegur/22-02-02_ConcentracionAgresionMachista_Prosegur_03.jpg)
As segunda concentración tivo lugar nas oficinas de Prosegur no Polígono da Agrela para esixirlle á empresa que de inmediato aplique o protocolo de acoso do Plan de Igualdade, tal e como lle requiriu a Inspección de Traballo, en relación á agresión machista sufrida por unha traballadora e delegada de persoal por parte doutro vixilante de seguridade cando se dispuña a realizar o cambio de quenda.
Tal e como lembrou a propia compañeira, que está de baixa dende que foi agredida o 20 de agosto pasado, a día de hoxe Prosegur segue sen pór en marcha o protocolo de acoso, malia o requirimento da Inspección, e nin sequera adoptou ningún tipo de medida contra o agresor, ao que está amparando e ao que até hai pouco tempo mesmo tiña ocupando o posto vixilante da traballadora no edificio do campus da Universidade de Ourense, afondando así no maltrato e no desamparo á compañeira.
De feito, subliña Ángela, o traballador foi cambiado de posto recentemente "pero non cumprimento da resolución ou por activación do protocolo, senón por circunstancias que nada teñen que ver coa agresión".
A universidade tampouco se pronunciou
![](https://cig.gal/imaxes/adaptadas/780/files/novas/2022/02/02/prosegur/22-02-02_ConcentracionAgresionMachista_Prosegur_06.jpg)
Malia estes gravísimos e violentos feitos, a Universidade de Vigo tampouco se pronunciou nin lle demandou a Prosegur -como cliente da empresa e como institución pública que é- que tomara medidas pola agresión, alegando que se trata dun conflito externo "e iso que levo como vixilante no campus máis de 20 anos".
Total desamparo da traballadora
A día de hoxe, Ángela non só segue de baixa médica e a tratamento das secuelas psíquicas que padece a causa destes feitos, senón que tamén está penalizada a nivel económico porque a mutua de Prosegur non lle recoñece o carácter de accidente laboral e o INSS limítase a dicir que non pode resolver o recurso até que non remate o proceso aberto no xulgado do penal. "Ás veces teño a impresión de estar vivindo nun pesadelo", afirma.
Hai que subliñar que a traballadora foi agredida verbal e fisicamente por outro vixilante de Prosegur, que ademais de insultala, facerlle xestos obscenos, quitarlle o teléfono e gravala co seu móbil, intentou atropelala varias veces, arrastrándoa polo garaxe mentres tiña os dedos atrapados na fiestra do vehículo, provocándolle así lesións en distintas partes do corpo.
![](https://cig.gal/imaxes/adaptadas/780/files/novas/2022/02/02/prosegur/22-02-02_ConcentracionAcosoProsegur_01.jpg)
Ao medo que sentiu a traballadora -que tivo que saír das instalacións en ambulancia- engádese o total desamparo no que quedou cando un responsábel xerárquico da propia empresa, home tamén, ignorou a súa chamada de auxilio, tentando despois restarlle importancia.
Un comportamento manifestamente machista e aínda así, a empresa non actuou, non adoptou ningunha medida de protección á traballadora, nin se puxo en contacto con ela e, por suposto, non aplicou medidas contra o agresor, senón que incluso o reafirmou no seu comportamento destinándoo ao posto de traballo da compañeira. Unha actitude empresarial que non se pode consentir, nin tolerar e á que a CIG lle seguirá dando cumprida resposta.
Acoso sindical no Carrefour dos Rosais
Porque ademais, o acoso e a súa permisividade parecen estar a orde do día en Prosegur. Precisamente, antes da protesta nas oficinas do polígono da Agrela, realizouse outra concentración no Carrefour do centro comercial dos Rosais, onde o delegado da sección sindical da Coruña está sufrindo acoso sindical dende hai meses.
![](https://cig.gal/imaxes/adaptadas/780/files/novas/2022/02/02/prosegur/22-02-02_ConcentracionAcosoProsegur_032.jpg)
As represalias comezaron despois de que o compañeiro denunciara na Inspección de Traballo a falta de medios técnicos para poder realizar o seu labor como vixilante e como delegado sindical. A persecución materialízase a través da imposición de sancións arbitrarias e inxustas ao compañeiro, a última delas con carácter grave por un presunto deixamento de funcións na súa actividade "do que non se achegaron probas nin evidencias".
Esta sanción derivou nunha suspensión de emprego e soldo "da que o compañeiro non é merecedor" e que será recorrida en vía xudicial.
Este tipo de prácticas, engade a sección sindical da CIG na empresa, estase convertendo en algo habitual en Prosegur, e inclúe todo tipo de artimañas como o revisado de cámaras para tentar descubrir calquera tipo de falta coa que poder sancionar o persoal.