A CIG participa nos actos conmemorativos do 35 aniversario da CUT de Chile
Conmemórase tamén o 50 aniversario do golpe contra Salvador Allende, que terá lugar o vindeiro 11 de setembro
Internacional -
Durante esta semana, estanse a celebrar diferentes actos en Santiago de Chile, enmarcados dentro do 35º aniversario da Central Unitaria de Traballadores (CUT) de Chile, o 50 aniversario do golpe contra Salvedor Allende -que se cumprirán o vindeiro día 11 de setembro-, e o 70 aniversario das orixes e creación do sindicalismo do que provén a CUT. A CIG asiste a estes eventos, convidada pola CUT, coa que vén mantendo unha relación de amizade e colaboración dende hai anos.
![](https://cig.gal/imaxes/adaptadas/780/files/novas/2023/08/25/Aniversario%20CUT%20Chile/2023-08-25_Aniversario_CUT_Chile0021.jpg)
Os actos deron comezo o pasado luns coa presenza de autoridades institucionais, representantes do goberno chileno, entidades sociais, as delegacións dos sindicatos convidados e das federacións sindicais CSI (Confederación Sindical Internacional) e CSA (Confederación Sindical das Américas), dando remate coas intervencións, entre outras, do Presidente da CUT, David Acuña, do Secretario Xeral, Erik Campos, e José Manuel Díaz, responsábel de finanzas.
Outro dos actos enmarcados neste aniversario, consistiu na presentación da emisión postal do selo “70 anos da CUT”, que conmemora o rol socio político que vén cumprindo a principal organización de sindicatos de Chile, impulsando a unidade dos traballadores e traballadoras, para as reivindicación dos seus dereitos, o diálogo e a mobilización. Desde os seus comezos, coa Federación Obreira de Chile (FOCH), a Confederación de Traballadores de Chile (CTCH) e a posterior creación da Central Única de Traballadores, até confluír na CUT actual. Unha longa historia, marcada pola difícil etapa, entre 1973 e 1988, na que sufriu a represión da ditadura de Pinochet, con moitos dos seus líderes asasinados e desaparecidos.
![](https://cig.gal/imaxes/adaptadas/780/files/novas/2023/08/25/Aniversario%20CUT%20Chile/2023-08-25_Aniversario_CUT_Chile0005.jpg)
Seminario
Celebrouse tamén o Seminario “Litio y Fure (Comité de Fundición y Refinación del Cobre). Soberanía alimentaria para Chile”, con intervencións de representantes gobernamentais, das pequenas empresas de minería e dos sindicatos do sector.
O martes tivo lugar a cerimonia central do aniversario da CUT, con intervencións de representantes do seu Consello Directivo Nacional, e a presentación das delegacións convidadas, e a asistencia de representantes parlamentarios e dirixentes sociais.
Dentro do programa previsto, fixéronse dúas parénteses: un acto simbólico de solidariedade con Cuba, esixindo o levantamento do bloqueo e outro que consistiu en desprazarse até San Fernando, para render homenaxe ao líder sindical histórico José Figueroa, pai da anterior Presidenta da CUT Bárbara Figueroa, e que finou xusto no comezo destes actos de aniversario.
Outros actos celebráronse fóra da sede da CUT, como os relacionados coa “Operación Cóndor, o voo maldito sobre Sudamérica”, que se celebrou no Museo da Memoria e os Dereitos Humanos, e que estivo dividido en dúas partes. Unha primeira exposición, a cargo da escritora e periodista Mónica González, que relatou as orixes da operación Cóndor, os últimos documentos coñecidos ao respecto e a necesidade de seguir alerta, diante das persistentes intencións imperialistas dos EEUU e os seus aliados, na actualidade, e que denunciou como seguen sen reparación moitos dos danos causados por aqueles anos sanguinarios.
![](https://cig.gal/imaxes/adaptadas/780/files/novas/2023/08/25/Aniversario%20CUT%20Chile/2023-08-25_Aniversario_CUT_Chile0017.jpg)
Tamén se desenvolveu un debate, no que participaron representantes sindicais dos países que sufriron en maior medida os danos da Operación Cóndor: Arxentina, Uruguai, Brasil e Chile (Paraguai nos pudo asistir, finalmente¡, ao acto). Estímase que a Operación Cóndor deixou arredor de 50.000 persoas mortas, 30.000 desaparecidas e 400.000 encarceradas, non só nos países que a conformaban, senón tamén noutras partes do mundo, onde actuaban as súas redes, na maioría dos casos en conexión con outras redes, como a Operación Gladio, sempre coa CIA detrás da intelixencia destas actuacións, como demostran diferentes documentos desclasificados.
As e os participantes asistiron tamén a sinatura dun Convenio, entre a CUT e a Fundación Congreso Futuro, que celebrará o vindeiro evento, de carácter internacional, no mes de xaneiro do ano 2024, en torno ás consecuencias das novas tecnoloxías e a Intelixencia Artificial, especialmente no mundo do traballo. Evento ao que asistirán numerosas autoridades, entre as que estarán varios Premios Nóbel.
Varios representantes sindicais, de Arxentina, Chile, Brasil, Italia e España, participaron nun seminario “ O rol do sindicalismo e a sociedade, fronte aos avances do fascismo en Chile e o mundo”, con posterior debate.
A celebración do Aniversario dará remate cun acto de clausura, as intervencións de todas as organizacións convidadas e a intervanción final do Presidente da CUT, David Acuña.
Posteriormente ao programa de Aniversario, a CIG manterá un encontro bilateral con responsábeis da CUT.