As traballadoras do SAF de Carballo exixen a suba salarial conforme ao IPC que estabelece o convenio
Carballo -
As traballadoras do Servizo de Axuda no Fogar de Carballo mobilizáronse na mañá deste xoves para exixirlle á empresa adxudicataria, FEPAS, que de inmediato aplique a suba salarial correspondente ao IPC real, tal e como estabelece o convenio colectivo. O persoal realizou unha marcha polas rúas da vila que saíu por volta das 11 horas das oficinas da empresa (situadas na rúa Perú) e rematou na Praza do Concello.
![](https://cig.gal/imaxes/adaptadas/780/files/novas/2023/04/13/SAF%20Carballo/2023-04-13_SAF_Carballo_SubaIPC_01.jpg)
Cómpre lembrar que Fundación para el estudio y la promoción de la acción social (FEPAS) entrou no SAF de Carballo en xaneiro deste ano cun contrato polo que recibirá 1.8 millóns de euros ao ano. A empresa comezou a prestar os servizos aplicándolle ao persoal as táboas salariais correspondentes a 2022.
Mais unha vez coñecido o IPC final de 2022, a empresa tería que proceder a actualizar os salarios un 5,7% (IPC real), tal e como estabelece o artigo 9 do convenio colectivo. Porén, a pesar das demandas neste sentido trasladadas polas delegadas do persoal e a CIG, "FEPAS non quere comprometerse a materializar o incremento na seguinte nómina nin a marcar os prazos para o abono dos atrasos xerados dende xaneiro", denuncia Martín Caamaño, responsábel da CIG de Carballo.
Garantir o mantemento da cláusula de revisión ligada ao IPC real no articulado do convenio galego foi unha das reivindicacións das traballadoras durante a folga sectorial realizada en novembro do pasado ano.
![](https://cig.gal/imaxes/adaptadas/780/files/novas/2023/04/13/SAF%20Carballo/2023-04-13_SAF_Carballo_SubaIPC_05.jpg)
Polo que agora, advirten que non van renunciar ao incremento dos salarios ao que teñen dereito "para que unha empresa privada siga engordando os seus beneficios a conta de explotarnos" e tras a mobilización deste xoves non descartan intensificar as accións de protesta ao longo das próximas semanas.
Neste senso, Caamaño tamén insta ao Concello de Carballo, como responsábel do servizo, a que garanta o cumprimento da lexislación vixente e obrigue a FEPAS a actualizar de inmediato as retribucións das traballadoras, que realizan unha actividade básica para centos de veciños e veciñas.
E no caso de que a empresa continúe sen asumir as súas obrigas, "o Concello debería proceder á rescisión do contrato por incumprimento grave e rescatar a concesión, volvendo a prestar este servizo público de maneira directa", conclúe.