A CIG convoca asembleas e mobilizacións contra o novo recorte nas pensións

Nacional -

A CIG acordou convocar asembleas de delegadas/os e mobilizacións en todas as comarcas para o próximo xoves, 3 de outubro, en resposta ao acordo para a reforma das pensións asinado polo Goberno español, a patronal e os sindicatos UGT e CCOO no marco do diálogo social. Esa modificación afecta directamente ao dereito a unha xubilación digna e avanza na privatización da sanidade pública, máis até o momento nin se fixo público o seu contido íntegro nin se publicou texto normativo ningún, o que, en palabras do secretario xeral da CIG, Paulo Carril, "nos leva a pensar que o acordo é aínda moito peor e máis regresivo do que se coñece".  

Horas e lugares das mobilizacións:
  • Compostela: 12h, na Praza de Galiza. Participará o secretario xeral da CIG, Paulo Carril, que fará declaracións aos medios ao inicio da protesta.
  • A Coruña: 12h, diante da Delegación do Goberno (Praza de Ourense).
  • Ferrol: 12h, diante do INSS (Rúa Catalunya).
  • Lugo:, diante da Subdelegación do Goberno (Praza Armanyá).
  • Ourense: 11:30h, na Subdelegación do Goberno (r/ Parque San Lázaro).
  • Pontevedra: ás 12h, na Subdelegación do Goberno (Praza de España).
  • Vigo: ás 12h, manifestación con saída dos Capuchinos.

Dificultar o acceso a unha xubilación digna

Con este acordo avalado polos sindicatos españois estase a dificultar o acceso á xubilación parcial e non se resolven as reivindicacións de colectivos laborais que padecen condicións de especial penosidade, perigosidade ou toxicidade. Carril reitera que toda modificación que non supoña recuperar a xubilación parcial aos 61 anos, en todas as actividades, "constitúe un prexuízo para os dereitos que a clase traballadora xa tiña recoñecidos e que lle foron roubados nas diferentes reformas das pensións encadeadas desde o ano 2011".

Afóndase tamén na privatización da sanidade pública ao ampliar os ámbito de actuación das mutuas na xestión da saúde das persoas traballadoras. O Goberno español, sen pasar polo Congreso nin por ningún ámbito institucional, asume os acordos atinxidos entre a patronal estatal e os sindicatos CCOO e UGT no V AENC para que sexan estas entidades privadas as que xestionen os procesos de Incapacidade Temporal e as patoloxías derivadas de enfermidades músculo-esqueléticas.

A CIG advirte que esta medida, posta en man do PP na Xunta de Galiza, pode multiplicar os seus efectos negativos como unha nova ferramenta para desmantelar o sistema sanitario público.

Reducción da xornada laboral

Outra das cuestións que se abordará nas asembleas será o debate para a redución da xornada laboral, da que se vén de anunciar que o Goberno español pretende untar a pequena empresa para que acepte a súa redución, diluíndose a reivindicación das 35 horas, que é onde tiña que estar realmente o obxectivo, tal e como levou a CIG nas mocións aos concellos na campaña Stop Precariedade.

A carón destas cuestións está tamén a implantación do modelo de Formación Profesional dual e como impactará no mercado laboral, porque todo indica que vai favorecer a explotación desa mocidade que vai entrar nos centros de traballo como man de obra barata.

Neste contexto, o Goberno do PP na Xunta lánzase desatado a repenicar políticas ditadas desde Madrid, máis preocupado pola lei de amnistía e por atacar o concerto singular para Catalunya que por deseñar medidas que melloren a vida das galegas/os e reclamar un financiamento xusto para Galiza. "A clase traballadora galega enfronta novos recortes de dereitos, aos que a CIG, como sindicato maioritario ten que responder", conclúe Carril.

Volver