Grupo Celta comprende as empresas Leche Celta SLU, Iberleche e Lactogal Productos Alimentares e conta con plantas en Andrade (Pontedeume), Meruelo (Santander) e Ávila, así como unha oficina comercial en Barcelona. “Nós entendemos que non procede a negociación dun convenio de empresa que no seu ámbito de aplicación incluía o centro de Pontedeume, porque aquí xa existe un convenio colectivo estatutario en vigor e a lei prohibe esta duplicidade”, explicou Francisco Cartelle, da Executiva Confederal da CIG.

Ante esta actuación patronal, a CIG xa presentou conflito colectivo nos xulgados para que se recoñeza esta unidade de negociación como a única válida para o persoal da fábrica de Pontedeume. Cartelle reiterou que non se pode negociar un convenio colectivo que afecte a un ámbito no que xa hai un marco laboral en vigor e destacou que, do grupo empresarial, o único centro de traballo con convenio propio é o de Pontedeume. “O resto de centros teñen acordos de empresa non estatutarios e, polo tanto, non teñen o carácter de norma, non son lei”.

Un convenio propio conseguido grazas á loita

Un logro, salientou a presidenta do comité, María Xosé Vizoso, que foi pelexado polas traballadoras e traballadores de Pontedeume, que no ano 2017 apostaron pola mobilización e a folga para conseguir melloras salariais e laborais por enriba do convenio estatal de industriais lácteas (de condicións moi precarias) que se plasmaron na sinatura do primeiro convenio da fábrica de Andrade.

Vizoso subliñou que a raíz da loita do persoal de Pontedeume para acadar este convenio, o resto de centros de traballo tamén puideron negociar acordos de empresa para mellorar as súas condicións, que son un “copia-pega”.

A presidenta do comité lamentou que durante as folgas para a consecución do convenio e para a súa renovación no ano 2021, as factorías de Santander e Ávila actuaran como elementos de esquirolaxe, ao derivarlles o grupo Celta a produción que non se podía sacar adiante en Galiza. “Na última negociación, a planta de Pontedeume estivo parada un mes, e o que estaba pasando era que Ávila e Santander envasaban o leite que non se podía envasar en Pontedeume nese tempo, e nunca tivemos apoio por parte destes compañeiros e compañeiras”, criticou.

Negociación de proximidade

Dende esta experiencia, matizou Cartelle, “resulta difícil que o persoal de aquí poda confiar neses compañeiros e compañeiras doutros comités que tiveron esa actitude de esquirolaxe. E hai que recordar que, incluso aquí, a representación da UGT na última folga, cando a situación se puxo tensa, dimitiu do comité de folga”.

Agora, con esta manobra, a empresa pretende retirarlle ao cadro de persoal de Pontedeume o poder de decisión sobre as súas condicións de traballo. “Aquí somos o 100% no ámbito de negociación deste convenio colectivo e no ámbito de negociación dese convenio de grupo de empresas pasaríamos a ter sobre un 30%, polo tanto non teríamos a maioría suficiente para impulsar uns avances que foran significativos e realmente bos para o persoal”, advertiu Cartelle.

Para avaliar todas estas cuestións e acordar as accións a levar adiante, a CIG vai convocar asembleas de traballadores e traballadoras este xoves día 30, co obxectivo de defender o dereito a unha negociación colectiva próxima, na que o persoal teña toda a capacidade de decidir en cada momento sobre o que se negocia.